Notrou meyna sarravon les ollagne

Nostrou polet ayen tot pier chanta

Et lous eyssarts qu’u fon pé le montagne

N’ayon quasi ni chalou ni clarta,

Quand un éfan que porta una roba

De fin argent (si fin n’en fut jamey)

Que traluyet ni mey mi moins que l’auba

Nos adussit lo bon tem et la pey.

U nos dissit d’alla vey la pucella

Qu’a afiat la pey en faisant son éfan

Quand je devrin engagi’ ma veyssella,

J’y volo alla lou dou bras pendolan,

N’y alla pas, sarit una vergogni,

N’y rian porta, sarit encore pi ;

J’ai dous agneux que n’ont pas prey la rougni,

Je seu d’avis de lous alla aufri

La Viergi a la fraichou de la rousa

Qu’u mey de may la rousa a mouilla,

Et sou tetet, per dire toute chousa,

Mey de blanchou que n’a notra caillia ,

Sou dou poupeux semblon a la mayousse

Don la rogeau a plaisi d’éclata

Et son motet la trovave si douce

Qu’a mala pene u la poyrt quitta

Lou pailliassieu dont y l’emmaillotave

Erion plu blanc que le premier ney,

Y saviet ben qund lou filave

Qu’u servirion un jour pe ceu grand rey

N’en venit tré que portavon de tasses

Tote doré, les offron a l’éfén ;

Mais quans Jousset lé sarrit din sé biasses,

Lo Rey Moret s’en allit dépétan

Ul et plus nier que ney notre cumaclo,

A lou chaveu frisa comme un agnet

Et loi savou farrit un grand miraclo

Si l’y poyet un pou blanchi la pet.

U dépétit ; mais quand sa conscienci

Li reochit, u n’en fut si mari,

Quul eussiet fat trey mey de penitenci

Si eusse pouy la fare à mont-Fleuri